//ПРЕЗИДЕНТ ДАВЛАТ ОРГАНЛАРИГА ХУСУСИЙЛАШТИРИШ НАТИЖАЛАРИНИ ҚАЙТА КЎРИБ ЧИҚИШ ТАШАББУСИ БИЛАН ЧИҚИШНИ ТАҚИҚЛАБ ҚЎЙДИ

ПРЕЗИДЕНТ ДАВЛАТ ОРГАНЛАРИГА ХУСУСИЙЛАШТИРИШ НАТИЖАЛАРИНИ ҚАЙТА КЎРИБ ЧИҚИШ ТАШАББУСИ БИЛАН ЧИҚИШНИ ТАҚИҚЛАБ ҚЎЙДИ

Ўзбекистон Республикаси президенти “Мамлакатда бизнес муҳитини янада яхшилаш ва тадбиркорликни қўллаб-қувватлаш тизимини такомиллаштириш чора-тадбирлари тўғрисида”ги қарорни имзолади.
Барча даражадаги давлат ҳокимияти ва бошқаруви органлари раҳбарлари, Қорақалпоғистон Республикаси Вазирлар Кенгаши, вилоятлар, Тошкент шаҳар, туман ва шаҳар ҳокимликлари Ўзбекистон Республикаси Конституциясининг 53-моддаси ҳамда “Хусусий мулкни ҳимоя қилиш ва мулкдорлар ҳуқуқларининг кафолатлари тўғрисида”ги Қонун талабларига сўзсиз риоя қилишлари шартлиги ҳақида қатъий огоҳлантирилди.
Белгиланишича, давлат тасарруфидан чиқариш ва хусусийлаштириш натижаларини, шу жумладан, объектларнинг қийматини баҳолаш натижаларини қайта кўриб чиқиш ва бекор қилиш масалалари юзасидан давлат органлари, шу жумладан, назорат, ҳуқуқни муҳофаза қилувчи органлар ва судлар томонидан ташаббус билан чиқиш хусусий мулкнинг дахлсизлигини бузиш сифатида баҳоланади ҳамда бундай ишлар кўриб чиқиш учун қабул қилинмайди.
Ўзбекистон Республикаси Бош прокуратураси хусусий мулкни ҳимоя қилиш ва мулкдорлар ҳуқуқларининг кафолатлари тўғрисидаги қонунчиликка қатъий риоя этилиши устидан назоратни кучайтирсин, давлат тасарруфидан чиқариш ва хусусийлаштириш натижаларини қайта кўриб чиқиш ва бекор қилиш ташаббуси билан чиққанлик учун ваколатли давлат органлари мансабдор шахсларининг муқаррар жавобгарлигини жиноий жавобгарликка тортишга қадар оширишни таъминлайди.
Манба: Кун.уздан 21.11.2019 йил олинди